მოსკოვი საქართველოსთან ურთიერთობების ნორმალიზებისკენ სერიოზულად არის განწყობილი, იმ პირობით, რომ ის რუსეთის წინააღმდეგ თამაშებში „ხურდა ფული“ არ გახდება, – ამის შესახებ რუსულ სამთავრობო გამოცემა „რია ნოვოსტი“-ს რუსეთის საგარეო საქმეთა სამინისტროს დსთ-ს ქვეყნების მეოთხე დეპარტამენტის დირექტორმა, მიხაილ კალუგინმა განუცხადა.
მისი თქმით, მოსკოვი თბილისთან სტაბილური ურთიერთობებისკენ ისწრაფვის. თბილისი ჯანსაღ პრაგმატიზმს და საგარეო საქმეებში მრავალვექტორიანი მიდგომისკენ ტენდენციებს ავლენს.
კალუგინმა ისაუბრა ეკონომიკურ კავშირებზეც. მისივე თქმით, საქართველოსთან რუსეთს არ აქვს დიპლომატიური ურთიერთობა, თუმცა არსებობს “აქტიური კავშირი, რომელიც ხელშესახებ სარგებელს იძლევა”.
“ამის წყალობით, ბოლო რამდენიმე წლის განმავლობაში ჩვენ ეკონომიკაში არც თუ ისე მცირე მიღწევები გვქონდა. ჩვენ არ გვაქვს დიპლომატიური ურთიერთობები, მაგრამ გვაქვს აქტიური კავშირი, რომელიც ხელშესახებ სარგებელს იძლევა. 2024 წელს სავაჭრო ბრუნვამ 2.4 მილიარდი დოლარი შეადგინა და აგრძელებს ზრდას. ჩვენი ტევადი ბაზარი – ფაქტობრივად ჩაუნაცვლებელია ქართული ექსპორტის მთავარი პროდუქტებისთვის. საქართველოში ტურისტების რაოდენობით რუსეთი პირველ ადგილზეა. თუ 2021 წელს ეს 200 000 ადამიანი იყო, 2024 წელს უკვე 1.4 მილიონზე მეტია. 2025 წელს საქართველოში რუსეთზე ტურისტული ნაკადის თითქმის მეოთხედი მოდიოდა. ორი წლის წინ ჩვენ განვაახლეთ საქართველოსთან პირდაპირი ავიამიმოსვლა. ვთვლი, რომ სატრანსპორტო სფეროში არის თანამშრომლობის განვითარების, ბარიერების აღმოფხვრისა და სატრანზიტო შესაძლებლობების გაფართოების პოტენციალი. ორმხრივი სარგებელი აქ აშკარაა.
თუ 2022 წელს საქართველოს ხელისუფლება დასავლელების სასარგებლოდ აირჩევდა ჩვენთან კონფრონტაციის მიმართულებას, მთელი ეს პოზიტიურობა არ იქნებოდა, საქართველოს ეკონომიკა კი 40%-ით ვერ გაიზრდებოდა.
რაც შეეხება ევროკავშირს, რეგიონში მის პოლიტიკურ ჩანაფიქრებზე უკვე ვისაუბრე. ეკონომიკაში ევროკავშირმა, როგორც ჩანს, ასევე ვერ გაამართლა საქართველოს მოლოდინები. 2014 წელს ევროკავშირთან ასოციაციისა და თავისუფალი ვაჭრობის შეთანხმების გაფორმების მიუხედავად, ქართულ საქონელს არავინ ელის ევროკავშირის ბაზარზე. ამაზე მშრალი ციფრები მეტყველებენ. დსთ-ზე ქართული საქონლის ბრუნვის 33% მოდის, ევროკავშირის მთელ ქვეყნებზე კი მხოლოდ 22%. ქართული ექსპორტის ნაწილში კი დსთ-სა და ევროკავშირის წილის სხვაობა უბრალოდ კოლოსალურია: 2024 წელს დსთ-ში საქართველომ თავისი საქონლის 70% დააექსპორტა, ევროკავშირში კი – 9%. ცხადია, ვისი ბაზარია ღია საქართველოსთვის, ვისი კი დახურული.” – თქვა კალუგინმა.