“ორი წერილი გამოქვეყნდა, პირველი იყო სახელმწიფო დეპარტამენტის სახელით გამოქვეყნებული და ჩვენი აღქმით, ეს წერილი ემსახურებოდა ერთადერთ რამეს, 26 მაისს ოპოზიციის აქციის გააქტიურებას. თუმცა, ნახეთ, რომ 3 000 კაცზე მეტი არ მივიდა მაქსიმალური მობილიზაციის პირობებში ამ აქციაზე, არც წერილმა უშველა და არც მაქსიმალურმა მობილიზაციამ. მოგვიანებით გამოქვეყნდა პრეზიდენტ ტრამპის მისალოცი წერილი, რომელიც გამოიგზავნა პრეზიდენტ ყაველაშვილის მიმართ. ეს წერილი ასახავდა იმ საერთო ღირებულებებს, რომლებიც აკავშირებს საქართველოს ხელისუფლებას და პრეზიდენტ ტრამპის ადმინისტრაციას. თუმცა, ასევე ხედავთ, რომ ამერიკის საელჩოს საქართველოში დღემდე, უკვე მე-4 დღეა თუ არ ვცდები, არ გამოუქვეყნებია თავის საიტზე პრეზიდენტ ტრამპის წერილი. როგორც თავადვე იტყოდნენ ხოლმე, ყველაფერი გასაგებია. ეს არის ერთადერთი შეფასება, რაც შეიძლება გავაკეთო.

სენატორი დეინსთან შეხვედრა თავისი არსით განსხვავდებოდა იმისგან, რაც წარსულიდან გვახსოვს, საუბარი იყო აბსოლუტურად ჯანსაღი კუთხით ურთიერთობების გადატვირთვაზე. ჩვენ კიდევ ერთხელ დავაფიქსირეთ პოზიცია, რომ საქართველოს ხელისუფლება სრულიად ღიაა კონსულტაციებისთვის. ჩვენ ღიად და საჯაროდ ვაცხადებთ, რომ აშშ-თან, სუფთა ფურცლიდან სტრატეგიული პარტნიორობის განახლება გვსურს, კონკრეტული გზამკვლევით. ამაზე მკაფიო შეთავაზება საქართველოს ხელისუფლების მხრიდან შეუძლებელია გაკეთდეს. ამ პირობებში ბიუროკრატიაში ჩაბუდებული “დიფ-სთეითი’ გარკვეული ბარიერების შექმნას ცდილობს, ქართულ-ამერიკული ურთიერთობების აღდგენაში, თუმცა დარწმუნებული ვარ, რომ პრეზიდენტი ტრამპი “დიფ-სთეითზე” გაიმარჯვებს და ქართულ-ამერიკული ურთიერთობების განახლებას წინ ვერაფერი დაუდგება. ოპოზიცია კი ღიმილის მომგვრელ მდგომარეობაშია, არ ვიცი ტყუილი რაში სჭირდებოდათ. თავად იცოდნენ, რომ სენატორს შეხვედრა ხელისუფლებასთანაც ჰქონდა დაგეგმილი” – ამის შესახებ ირაკლი კობახიძემ განაცხადა, რითაც ამერიკის შეერთებული შტატების პრეზიდენტის დონალდ ტრამპის მიერ, მიხეილ ყაველაშვილისთვის 26 მაისის დღისადმი გაგზავნილ წერილს და ამერიკელი სენატორის სტივ დეინსის ვიზიტსაც გამოეხმაურა