აშშ-ის 12 სენატორი, მათ შორის ექვსი რესპუბლიკელი და ექვსი დემოკრატი, პრეზიდენტ დონალდ ტრამპს რუსული დიზელის მსოფლიო ბაზარზე დაშვების შესახებ ვლადიმირ პუტინთან მიღწეული შეთანხმების გაუქმებისა და რუსეთის წინააღმდეგ სანქციების აღდგენისკენ მოუწოდებს.
Reuters-ის ცნობით, კანონმდებლებმა ტრამპს წერილით მიმართეს და გააკრიტიკეს მისი გადაწყვეტილება, რომელიც რუსეთის დიზელის ექსპორტზე სანქციების შემსუბუქებას ითვალისწინებს.
სენატორების განცხადებით, აშშ-ის სახაზინო დეპარტამენტის მიერ გაცემული ზოგადი ლიცენზია №135 რუსეთს დიზელის ექსპორტის საშუალებას აძლევს, რაც კრემლს უკრაინის წინააღმდეგ ომის დასაფინანსებლად დამატებით შემოსავალს მოუტანს.
„რუსეთისთვის დიზელის მსოფლიო ბაზრებზე თავისუფლად გაყიდვის შესაძლებლობის მიცემა აშშ-ის უსაფრთხოების ინტერესებს აზიანებს და უკრაინელი ხალხის ღალატია, რომელიც პუტინის სასტიკი და უკანონო ომის წინააღმდეგ განაგრძობს ბრძოლას. ეს შეთანხმება ჩვენი მოწინააღმდეგისთვის საჩუქარია და ჩვენი მოკავშირეების ღალატია – ის უნდა გაუქმდეს“, – წერენ სენატორები.
მათი შეფასებით, რუსული დიზელის მსოფლიო ბაზარზე დაშვება ამერიკელებისთვის საწვავის ფასების შემცირების თვალსაზრისით უმნიშვნელო შედეგს მოიტანს, მაშინ როცა რუსეთი მიღებულ შემოსავალს უკრაინის წინააღმდეგ ომის გასაგრძელებლად გამოიყენებს. კანონმდებლები ასევე აცხადებენ, რომ შეთანხმება გააღრმავებს რუსეთის უსაფრთხოების სფეროში თანამშრომლობას ჩინეთთან, ირანთან და ჩრდილოეთ კორეასთან.
სენატორები ტრამპს მოუწოდებენ, სანქციების შემსუბუქების ნაცვლად, გამოიყენოს რუსეთისა და ირანის წინააღმდეგ სანქციების შესახებ კანონი, რომელსაც კონგრესმა მხარი დაუჭირა და პრეზიდენტმა სექტემბერში მოაწერა ხელი. მათი თქმით, ამ კანონის ფარგლებში გათვალისწინებული ზომები რუსეთზე ეკონომიკური ზეწოლის გაძლიერებასა და სამართლიანი მშვიდობის მიღწევას უნდა ემსახურებოდეს.
„ათწლეულების განმავლობაში ამერიკა თავისუფლების საყრდენი იყო ტირანიის წინააღმდეგ ბრძოლაში და აშშ-ის პრეზიდენტები ტირანების წინააღმდეგ ჩვენი ქვეყნის წინააღმდეგობას განასახიერებდნენ. პუტინი ტირანია. გამოდით ამ შეთანხმებიდან, გააუქმეთ ზოგადი ლიცენზია №135 და გამოიყენეთ 2026 წლის ლინდსი გრემის კანონი რუსეთისა და ირანის წინააღმდეგ სანქციების შესახებ“, – ნათქვამია წერილში.
წერილს ხელი მოაწერეს რესპუბლიკელმა სენატორებმა თომ ტილისმა, სიუზან კოლინზმა, ალან არმსტრონგმა, ლიზა მურკოვსკიმ, მიჩ მაკკონელმა და ჯონ კორნინმა, ასევე დემოკრატებმა რიჩარდ ბლუმენტალმა, ჯინ შაჰინმა, დიკ დერბინმა, შელდონ უაიტჰაუსმა, ჯეკ რიდმა და კრის კუნსმა