უნგრეთის პრემიერ-მინისტრი, ვიქტორ ორბანი საფრანგეთის ულტრამემარჯვენე პარტია “ეროვნული გაერთიანების” ლიდერს, მარინ ლე პენს, რომელიც სასამართლომ ევროკავშირის თანხების გაფლანგვაში დამნაშავედ ცნო, მხარდაჭერას უცხადებს.
“მე ვარ მარინი”, – წერს ორბანი სოციალურ პლატფორმა X-ზე.
მარინ ლე პენის მიმართ სოლიდარობას გამოხატავს იტალიის ვიცე პრემიერ-მინისტრი, მატეო სალვინიც.
“ისინი, ვისაც ეშინია ამომრჩეველთა განაჩენის, ხშირად სიმშვიდეს სასამართლოს გადაწყვეტილებაში პოვებენ. პარიზში დაგმეს მარინ ლე პენი და სურთ მისი გარიცხვა პოლიტიკური ცხოვრებიდან. ცუდი ფილმი, რომელსაც ასევე ვხედავთ სხვა ქვეყნებში, როგორიცაა რუმინეთი. მარინ ლე პენის წინააღმდეგ განაჩენი არის ომის გამოცხადება ბრიუსელის მიერ, იმ დროს, როდესაც ფონ დერ ლაიენისა და მაკრონის საომარი იმპულსები შიშის მომგვრელია. ჩვენ არ დავშინდებით, არ გავჩერდებით: მთელი სისწრაფით წინ, მეგობარო!”- აცხადებს მატეო სალვინი.
მარინ ლე პენის წინააღმდეგ სასამართლოს გადაწყვეტილებას აკრიტიკებს ნიდერლანდების ულტრამემარჯვენე თავისუფლების პარტიის თავმჯდომარე და პარტიის ლიდერი წარმომადგენელთა პალატაში, ხეერტ ვილდერსი.
“შოკირებული ვარ, მარინ ლე პენის წინააღმდეგ გამოტანილი წარმოუდგენლად მკაცრი განაჩენით. მხარს ვუჭერ და 100 პროცენტით მჯერა მისი, რომ ის მოიგებს აპელაციას და გახდება საფრანგეთის პრეზიდენტი”, – აცხადებს ხეერტ ვილდერსი.