თეთრი სახლის პრესსპიკერმა ქეროლაინ ლევიტმა დაადასტურა, რომ აშშ-ის პრეზიდენტის სპეციალური წარმომადგენლები — სტივ უიტკოფი და ჯარედ კუშნერი — 25 აპრილის დილით პაკისტანში გაემგზავრებიან ირანთან მოლაპარაკებების გასამართად. იუწყება CNN.
ლევიტის თქმით, მოლაპარაკებები პირდაპირი ფორმატით გაიმართება და პაკისტანი პროცესში შუამავლის როლს შეასრულებს.
„შემიძლია დავადასტურო, რომ სპეციალური წარმომადგენლები სტივ უიტკოფი და ჯარედ კუშნერი ხვალ დილით კვლავ გაემგზავრებიან პაკისტანში მოლაპარაკებების გასამართად — პირდაპირი მოლაპარაკებებისთვის, პაკისტანის შუამავლობით, რომელიც მთელი ამ პროცესის განმავლობაში წარმოუდგენლად კარგი პარტნიორი და შუამავალი იყო — ირანის დელეგაციის წარმომადგენლებთან,“ — განაცხადა მან.
მისივე თქმით, ირანული მხარე თავად დაუკავშირდათ და პირისპირ შეხვედრა ითხოვა.
ლევიტმა ასევე აღნიშნა, რომ აშშ-ის ვიცე-პრეზიდენტი ჯეი დი ვენსი პროცესში აქტიურად არის ჩართული, თუმცა ამ ეტაპზე შეერთებულ შტატებში დარჩება პრეზიდენტთან, სახელმწიფო მდივან მარკო რუბიოსთან და ეროვნული უსაფრთხოების გუნდთან ერთად, რათა მუდმივად მიიღოს ახალი ცნობები.
„რა თქმა უნდა, საჭიროების შემთხვევაში ყველა მზად იქნება პაკისტანში გაემგზავროს,“ — დასძინა მან