მოსალოდნელი სარეკორდო ცივი ამინდის გამო არჩეული პრეზიდენტის დონალდ ტრამპის ინაუგურაცია 20 იანვარს ვაშინგტონში არა კაპიტოლიუმის შენობის გარეთ, არამედ შიგნით გაიმართება. ამის შესახებ ამერიკული ტელეკომპანია CNN-ის მიერ გავრცელებული ცნობა მოგვიანებით სოციალურ ქსელში თავად დონალდ ტრამპმაც დაადასტურა.
“ამიტომ მე გავეცი განკარგულება, რათა საინაუგურაციო სიტყვა, სხვა ლოცვისა და სიტყვების კვალდაკვალ, წარმოვთქვა აშშ-ის კაპიტოლიუმის როტონდაში, რომელიც 1985 წელს რონალდ რეიგანმა გამოიყენა ასევე ძალიან ცივი ამინდის გამო. სხვადასხვა მაღალი რანგის პირსა და სტუმრებს კაპიტოლიუმში მიიყვანენ. ეს იქნება ძალიან სასიამოვნო სანახაობა ყველასთვის, განსაკუთრებით ტელეაუდიტორიისთვის“, – წერს დონალდ ტრამპი სოციალურ ქსელ Truth Social-ში.
ტრამპი საპრეზიდენტო ფიცს ორშაბათს, 20 იანვარს, ვაშინგტონის დროით შუადღისას დადებს. მეტეოროლოგების თქმით, ამ დღეს ტემპერატურა შესაძლოა -11 გრადუსამდე დაეცეს.
“ამინდის პროგნოზის თანახმად, ვაშინგტონში ტემპერატურამ, ქარის ცივი ინდექსის გათვალისწინებით, შესაძლოა რეკორდულად დაბალ ნიშნულს მიაღწიოს. არ მინდა, რომ ვინმემ რაიმე სახით დაშავდეს ან დაზიანდეს”, – წერს დონალდ ტრამპი.