იტალიის პრემიერ-მინისტრმა ჯორჯია მელონიმ და უკრაინის პრეზიდენტმა ვოლოდიმირ ზელენსკიმ შეხვედრის დროს უკრაინაში ბრძოლის ველზე არსებული ვითარება და ქვეყნისთვის დამატებითი საჰაერო თავდაცვის საჭიროებები განიხილეს.
ამის შესახებ უკრაინის პრეზიდენტი X-ზე წერს.
ზელენსკის თქმით, მოლაპარაკებებისას ასევე ისაუბრეს თავდაცვის სფეროში თანამშრომლობაზე.
„შევთანხმდით, რომ ჩვენი გუნდები შეიმუშავებენ დრონების შეთანხმების [Drone Deal] დეტალებს ჩვენს ქვეყნებს შორის“, — აღნიშნა მან.
გარდა ამისა, ლიდერებმა განიხილეს ვითარება ახლო აღმოსავლეთში და სპარსეთის ყურეში, რომელიც დაკავშირებულია ირანში მიმდინარე ომთან.
“მნიშვნელოვანია, რომ ამ ომის შემდეგ უსაფრთხოება უფრო გაიზარდოს და არა შემცირდეს, და რომ თითოეული ხალხის ინტერესები პატივისცემით იყოს დაცული. როგორი იქნება უსაფრთხოება ამ ომის შემდეგ — ეს გლობალურად მნიშვნელოვანი საკითხია. ახლა კი ჩვენ ევროპაში განსაკუთრებით უნდა გავაძლიეროთ კოორდინაცია, რათა დავიცვათ ჩვენი ინტერესები და ცხოვრების წესი”, — განაცხადა უკრაინის პრეზიდენტმა