მედიაში გავრცელებულ კადრებში ჩანს, რომ რუსეთში, ორენბურგის ოლქის ქალაქ იასნიში სავარაუდოდ კონტინენტთაშორისი ბალისტიკური რაკეტა წარუმატებლად გაშვების შემდეგ აფეთქდა და ჩამოვარდა.
რუსულ Telegram-არხებში გავრცელებულ ვიდეოში ჩანს, რომ სავარაუდო კონტინენტთაშორისი ბალისტიკური რაკეტა გაშვების შემდეგ ვარდება, აფეთქების შედეგად კი იისფერი კვამლი წარმოიქმნება.
უკრაინული სამხედრო გამოცემა Мілітарний წერს, რომ ვიდეოში სავარაუდოდ Авангард-ის ტიპის ზებგერითი ფრთოსანი ქობინის მქონე УР-100Н ტიპის კონტინენტთაშორისი ბალისტიკური რაკეტა ჩანს.
ამასთან, Telegram-არხი Astra წერდა, რომ ადგილობრივი მოსახლეობის თქმით, აფეთქებისა და კვამლის მიზეზი რაკეტის წარუმატებელი გაშვება იყო. მოგვიანებით, Astra წერდა, რომ რაკეტა შესაძლოა Сармат-ის ტიპის კონტინენტთაშორისი ბალისტიკური რაკეტა ყოფილიყო.
შემთხვევასთან დაკავშირებით ოფიციალური განცხადება ჯერ არ გაკეთებულა.
იასნიში მდებარეობს კოსმოდრომი და სარაკეტო ბაზა. ეს 11-იდან ერთ-ერთი პუნქტია, რომლიდანაც რუსეთს სახმელეთო ბაზირების შორი მანძილის რაკეტების გაშვება შეუძლია