უკრაინის პრეზიდენტმა ვოლოდიმირ ზელენსკიმ ქვეყნის თავდაცვის ინდუსტრიას დაავალა, გაზარდოს შორ მანძილზე მოქმედი უპილოტო საფრენი აპარატების წარმოება, რათა უკრაინის შეიარაღებულ ძალებს რუსეთის ტერიტორიაზე დღეში 1 000-მდე დრონის გაშვება შეეძლოთ.
უკრაინის პრეზიდენტის თქმით, ამჟამად უკრაინის თავდაცვის ძალები დღეში საშუალოდ 300-ზე მეტ დრონს იყენებენ, თუმცა თავდაცვის ინდუსტრიის წინაშე დასახულია ამ მაჩვენებლის მნიშვნელოვნად გაზრდის ამოცანა.
„ამოცანაა, რუსეთის წინააღმდეგ დღეში შორ მანძილზე მოქმედი 1 000 დრონის გამოყენება. მიზანი სრულიად კონკრეტულია და ამ ამოცანას შევასრულებთ“, – განაცხადა ზელენსკიმ.
მისი თქმით, წარმოების რამდენჯერმე გაზრდის აუცილებლობა რუსეთის მხრიდან საჰაერო ტერორის გაძლიერებამ და რეაქტიული „შაჰედების“ მასობრივმა გამოყენებამ განაპირობა.
„რუსებმა ტერორის გაძლიერების ტაქტიკა აირჩიეს. კიევში საჰაერო განგაში თითქმის უწყვეტად ცხადდება. სამწუხაროდ, უკვე რეაქტიული „შაჰედებიც“ შემოდიან. იგივე ხდება ჩვენს სხვა ქალაქებსა და თემებში – მუდმივი იერიშებია ხარკივზე, ზაპოროჟიეზე, სუმის, ჩერნიჰივისა და დნიპროპეტროვსკის ოლქებზე, ჩვენს ხერსონზე“, – აღნიშნა მან.
ამასთან, უკრაინის პრეზიდენტმა განაცხადა, რომ უნდა დაჩქარდეს იმ ჩამჭრელი დრონების წარმოება, რომლებსაც რუსული რეაქტიული უპილოტო აპარატების ეფექტურად განეიტრალება შეუძლიათ.
ზელენსკის თქმით, უკრაინის თავდაცვის ძალების მიერ რუსეთის ტერიტორიაზე მდებარე ობიექტებზე სისტემატურად განხორციელებულმა დარტყმებმა უკვე შესამჩნევი ეკონომიკური და ლოგისტიკური შედეგი გამოიღო. რუსეთში საწვავის მნიშვნელოვანი დეფიციტია, რის გამოც ქვეყანა ისტორიაში პირველად იძულებული გახდა, ბენზინი შემოეტანა და ნავთობის სექტორისთვის სუბსიდიები გამოეყო.
„და ასეთი დანაკარგები მათ კიდევ უფრო მეტი ექნებათ, თუ რუსეთს ამ ომის დასრულებაზე ნორმალურად საუბარი არ სურს.
ჩვენმა სამხედროებმა ნოვოროსიისკთან დაკავშირებითაც წარმოადგინეს ინფორმაცია. უკვე ვაღწევთ სასურველ შედეგს – ნოვოროსიისკში არც ერთი გემი შედის და არც ერთი გემი გადის. ნოვოროსიისკში გემების მოძრაობის გარეშე გატარებული ყოველი დღე რუსეთის სამხედრო პოტენციალის შემცირებაში შეტანილი წვლილია. აუცილებლად ვიპოვით გზებს, რომ მათი სხვა პორტებიც დავბლოკოთ“, – განაცხადა ზელენსკიმ.